Randai Harimau nan Salapan_7

Kisah Si Galombang Dunia

Gurindam	:	Lah aman galanggang tampek balago Urang lah pulang kasadono Lorong baliau nan batigo Pulang ka surau anyo lai Ka baraliah anyo lai Sungguah baraliah sinen juo Aliah kapado Galombang Dunia Duo jo hadih Siti Ramalan Elok didanga barito no
Glbng Dunia	:	Oo.. diak kanduang Siti Ramalan Urang nan arih bijaksano Denai kabarang dikatoanKa sikolah adiak sakutiko Bukan denai Kanari sajo Kanari anak rang Padang Bukan denai kumari sajo Gadang mukasuk nan dijalangAdiak kanduang Siti Ramalan Pautan cinto kasiah sayang Danga dek adiak jaleh-jaleh Lorong kapado badan denai Niat sangajo dalam hati Nak bajalan ka rantau urang Kunun kaba nan den danga Tambang tabukak di Manggani Tambang ameh jo tambang perak Ka kian bana mukasuk hati Izin jo reda denai pintak Pulang maklum ka adiak kanduang
Siri Ramalan	:	Oo.. tuan Galombang Dunia Mandanga kato dari tuan Tasirok darah di dao Tagamang sumangat diri Lintuah anggoto ka tujuah noA tu nan sabana mangko baitu Kasiah nan baru ka bamulai Cinto nan baru manyusuak Cinto tasangkuk ka tuan surangKini ka babaok bajalan jauah Jauah rasono hati nan ko Nan bak paja arek manyusu Dicarai apo ka dayo no Iyo juo bak pantun urang: Silasiah di kampuang Pulai Diambiak nak rang Pauah Kambanglah bungo parautan Kasiah nan baru bamulai Tuan bao bajalan jauah Itu mamabuak paratian Tambah pulo tuan kanduang Ma agak ka diri denai Lah duo hari jo kapatang Indakno tantu nan di kakok Indak jaleh nan ka diawai Hati di mabuak kiro-kiro Badan digilo angan-angan Pangana ka tuan patang pagi Denai di dapua sadang manjarang Duo kali garam batambah ka gulai Randanglah anguh dek pangacau Kain nan tapanggang indak tau Bak mantun bana badan denai  Oo.. Tuan Galombang Dunia Usah tuan pai marantau Elok awak di rumah sajo Bialah tampak patang pagi Bak nantun nan sanang dalam hati Pulang malum pada tuan
Glmbg Dunia	:	Adiak kanduang Siti Ramalan Mandanga kato dari adiak Itulah kato nan sabanano Tembaklah tampak ba alamat Tabayang putiak dalam bungo Tadanga kukuak dalam taluaJikok salorong tantang itu Usahlah adiak cameh bana Lorong kapado cinto denai Tunggang bulek ka adiak surang Iyo bana bak pantun urangAyam biriang baikua panjang Ikua tajelo ka jarami Ambiak tampuruang bari makan Tujuah baleh jorong di Kamang Adiak surang tampek hati Nan lain buliah diharamkan  Limbak nan daripado itu Adok ka diri badan denai Kareh hati den nak marantau Dicubo malatiah diri Untuang ado parubahan Dicubo agak sabelok Untuang baiak sia nan tahu Antah kok Allah Nan Kuaso Lapeh jo ridha adiak kanduang Pulang maklum pado adiak
Siti Ramlan	:	Oo.. Tuan Galombang Dunia Tuanlah kareh nak ka marantau Apo ka tenggang badan diri Raso ka ilang nyawo di badan Duduak sinaruh, tagak sinaruh Nan bak bamakan buah simalokamo Dimakan antah, dibuang bedo Sansailah badan dibuek no Oo.. Tuan Galombang Dunia Kini baitulah dek tuanDitambang indak tatambang Nan bak manambang batang sampia Ditateh malah nan jadi Dilarang indak talarang Nan bak malarang aia ilia Dilapeh malah nan jadi Tapi samantangpun baitu Usah lamo tuan di rantau Lakeh sugiro tuan pulang Pulang maklum pado tuan
Glmbg Dunia	:	Kalau nan bak nantun kato adiak Alah sanang di dalam ati Alah sunyi dalam kiro-kiro Cuma pitaruah dari denai Jagolah diri elok-elok Pasanang sajo ati nan tun Alah ka jaleh tu dek adiak denai..
Siti Ramalan	:	Oo.. tuan badan denai Ubek jariah palarai damam Kok iyo tuan ka bajalan Ikolah saputangan nan sahalai Untuak pa apuh-apuh paluah Ganti panyeka-nyeka tangan
Glmbg Dunia	:	Kalau baitu kicek adiak Denai tarimo jo sanang hatiSianok jalan ka Koto Gadang Taruh jalan ka Koto Tuo Tampak nan dari Nagari Kurai Jo suok jawek kasiah sayang Jo kida apuh aia mato Denai bajalan anyo lai
Gurindam	:	Manangih Siti Ramalan Manangih baibo-ibo Galombang bajalan juo Iyo manjalang ayah kanduang Andailah jatuah maso itu
Glmbg Dunia	:	Ayah kanduang badan dek ambo Ayah kanduang Labai nan Bana Gadang mukasuk jo sangajo Mangko ayah dijalang bana
L.N.Bana	:	Anak kanduang Galombang Dunia Jarek samato ayah jo bundo Katokan apo nan takana Nak sanang hati kami baduo
Glmbg Dunia	:	Ayah kanduang dek badan diri Mangko denai datang ka ayah Mukasuk denai pai marantau Tambang tabukak di Manggani Itulah rantau nan ka dijalang Izin dimintak ka bakeh ayah Itulah kaba dari ambo
L.N.Bana	:	Oo.. buyuang Galombang Dunia Denai lah maklum tantang itu Kok anak pai marantau Ayah lapeh jo suko atiTapi samantangpun baitu Danga pitaruah ayah kanduang Jikok buyuang pai marantau Kawan cari dunsanak cariMangko baitu kato ayah Lauik sati rantau batuah Urang tuo banyak nan kiramat Oo.. nak kanduang sibiran tulang Jikok anak bainduak samang Turuk kato jo karajo no Usah disolang jo disanggah Turuk sajo bak aia ilia Kalau manyauak diilia-ilia Kalau bakato marandah-randah Pandai-pandai bainduak samang Elok-elok ka mamak angkek Usah diguluk jo galosang Ansua sajo basulambek  Oo.. buyuang anak dek ayah Jikok anak basamo gadang Usahlah calo mancalokan Usahlah hino mahinokan Arek-arek mamacik janji Taguah-taguah mamacik satia Buatan usah diubahi Kok malu samo sa tuntuk Kok malang samo satulak Usah manuhua kawan sairiang Mangguntiang dalam lipatan Takuk budi ka tajua Rusuah paham nan ka tagadai Pahamkan bana tu anak kanduang Iyo jo bunyi papatah: Nan kuriak iyolah kundi Nan sirah iyolah sago Nan baiak iyolah budi Nan indah iyolah baso Sakitulah dari ayah Pulang maklum ka anak kanduang
Glmbg Dunia	:	Kalau bak nantun kato ayah Denai lah maklum tantang itu Sapanjang pitaruah ayah nantun Den ganggam den pacik arek Siang denai batungkek Malam denai pakalang Alun kasanang ati ayah..?
L.N.Bana	:	Oo.. buyuang Galombang Dunia Kalau bak nantun kicek buyuang Alah sanang di dalam hati Sunyi di dalam kiro-kiro
Glmbg Dunia	:	Kalau bak nantun kato ayah Denai bajalan anyo lai..