Pidato Pasambahan Siriah_1

[caption id="" align="alignleft" width="400"] Ilustrasi gambar: Artalentalle[/caption]

Si Pangka

Jam gadang di Bukittinggi
Kurai Taji di Pariaman
Sambuiklah salam dari kami
Kaganti kito bajawek tangan

Assalamu'alaikum Warahmatullahi Wabarakatu

Mulonyo jalo diserakkan
Kanai kulari nan bapalun
Mulonyo kato disambahkan
Jari sapuluah nan ambo susun

Dari japun handak ka japun
Cino mamuek pacah balah
Ampun baribu kali ampun
Ampunlah ambo niniak mamak nan gadang basa batuah

Lah panek kami babensi
Rabab talatak di pamatang
Lah panek kami mananti
Sutan nan indak kunjuang datang

Rubiyah pandai manjaik
Putuih suto uleh kulindan
Nan bak sawah babanda langik
Putiah mato mananti ujan
Apo badakak dipalano
Parmato jatuah ka lambah
Duduak ambo lai batanyo
Tagak ambo mambilang sambah

Sambah di Allah shalawat di Nabi
Sambah kabanaran saidina alam
Mako diurah sagalo tambo nabi adam
Ateh duo, tigo, ampek jo limo

Ado kalonyo sambah ayat
Ado kalonyo sambah alamat
Ado kalonyo sambah malayu
Tampek manyambah rajo-rajo

Ateh balai balerong panjang
Salingka jorong salingka Korong
Tampek pamedan panghulu kito
Bungo satangkai nalo-nali
Harum sataun palayaran
Maraok buruang di udaro
Ateh bungo maso itu

Umpamo gombak ateh kapalo
Umpamo parmato intan ateh ameh
Umpamo sitawa jo sidingin
Umpamo kumpai jo cikarau dalam nagari

Umpamo kayu gadang di tangah koto
Ureknyo taguah ka bumi
Pucuaknyo cewang ka langik
Rantiangnyo perak aso-aso
Buah manjadi buah palo
Bungo manjadi bungo cangkeh
Gadang batang tampek basanda
Ureknyo tampek baselo
Rimbun daun tampek balinduang

Tampek pangulu main alua
Tampek tuanku main kitab
Tampek nan mudo ba sanda gurau
Tampek nan rusuah ba ibo hati

Bunyi galak badarai-darai
Bunyi undang ba buah-buah
Bak cando rahmat turun ka dunia
Di sangko dunia lai ka kaka
Karambia di tangah padang
Tumbuah di batu nan ta tagak
Tampak nan dari indo giri
Tantangan taluak rang malako
Jikok dunia alah takambang
Jikok medan alah tarapak
Kok adat alah badiri
Di ateh rumah nangko

Apolah nan jadi adat dalam nagari
Siriah bacabiak pinang bagatok
Kulansiang balapeh, padahan tibo
Timbakau bajujuik kapua basah

Rang alak koto di alai
Iliakan sawah di aro
Nampak di batu nan tatagak
Kok banyak siriah di badai
Saketek dalam carano
Rila jo maaf kami pintak

Anak urang sungai balansiang
Ba tuduang-tuduang kakarakok
Nak ilia ka balai gurah
Siriah nak mintak di guntiang
Pinang nak mintak digatok
Talatak dalam carano, sakian ambo maantakan sambah
Tarantang tali tarantang
Tarantang tali ka tandikek
Di ladang anak urang koto tuo
Jikok dirantang namuah panjang
Elok dikumpa naknyo singkek
Singkek sakiro ka paguno

Tabang barabah ka muaro
Batang si tawa di inggok i
Sambuiklah sambah dari ambo
Kok gawa tolong ampuni

Badia si japun Bangka ulu
Panembak unggan di kualo
Maaf dimintak ka pangulu
Pidato baleh dek juaro