Pidato Pasambahan Siriah_4

Oleh: Nasrul Anwar Dt. Barbanso

Si Alek
Lah ilia kareta solok
Manuruik darisi banyak
Tibo sakali di jambatan
Kalau carano ka kami singkok
Urang balimo ba dunsanak
Lai ko cukuik ka limonyo sutan

Si Pangka
Ramilah pasa kampuang cino
Di simpang jalan ka panganak
Rami dek anak bukittinggi
Tampek urang manjua pisau
Pisau di bali sutan bagindo
Kok itu di sutan manjadi buah tanyo
Urang balimo ba dunsanak
Siapolah tak namuah pai
Jikok takurang di timbakau
Timbakau kan lai sutan bao

Si Alek
Ramilah pasa koto nopan
Rami dek anak bukittinggi
Pulang nyo di hari sanjo
Nak lalu ka kubang putiah
Janji bakarang bamuliakan
Padan baukua batapak i
Carano ta anta pulo
Lah labiah bak raso makan siriah sutan
Si Pangka
Pulau banamo gambar lelan
Di baliak pulau maha lintang
Tapatan kapa dari bintan
Itulah kapa rang malako
Harok lah ambo dari sutan
Cabiaklah siriah gatoklah pinang
Paliklah sadah di kapuran
Lah langkok gambia dalam carano

Si Alek
Rancak musajik sungai sariak
Gobahnyo batingkek ampek
Ba tunggak ba pintu pulo
Kok siriah ka kami cabiak
Batanyo kami saketek
Dima asa siriah nangko sutan

Si Pangka
Taganang aia di jajaran
Anyuik cikarau mudo-mudo
Sutan mamintak katarangan
Karakok asa mulonyo sutan

Si Alek
Bidodari mamasang kudo
Mahadok ka panurunan
Urang banyak akan mamandang
Biopari sutan juaro
Di aliah pulo patanyoan
Bara alai siriah sagagang sutan

Si Pangka
Tampaklah kapa di lautan
Lah ilia ka mudiak padang
Rajo mamandang dari balai
Mambaok barang nan gaib
Tampak sanjato nak baparang
Jikok itu sutan tanyokan
Kok pandai sutan mambilang
Bilang lah bintang di langik
Papalah kasiak di pantai
Sakitu banyaknyo siriah sagagang suatn

Si Alek
Tarantang kamek dari pasa
Di kaida jalan ka sipiran
Tibo skali di birugo
Sutan tabilang pandai bana
Di aliah pulo patanyoan
Dima asa pinang nangko sutan

Si Pangka
Padang sarai ikannyo banyak
Ikan nan datang dari muaro
Arai babungkuh jo kalupak
Sinan lah asa pinang nangko sutan

Si Alek
Balaia kapa di lautan
Balaia sampai ka muaro
Di aliah pulo patanyoan
Apo tandonyo pinang mudo sutan

Si Pangka
Malatuih badia dari bukik
Sasarannyo sampai ka muaro
Sardadu tibo di lautan
Biru manih ruponyo kulik
Tigo pareso di baonyo
Itu tandonyo pinang mudo sutan

Si Alek
Ramai lah pai manakiak
Anak urang di buluah kasok
Pulangnyo di ari sanjo
Jikok siriah ka kami cabiak
Jikok pinang ka kami gatoka
Dima asanyo gambia nangko sutan